Á viðburðinum verður lögð áhersla á frjálsa túlkun í hreyfingu með núvitundaræfingu og öndun að leiðarljósi. Viðburðurinn hittir á sumardaginn fyrsta og hentar því einstaklega vel til að taka vel á móti sumrinu og kveðja veturinn með samspili lifandi tónlistar og hreyfingar.

Katrín mun leiða djúpt og innilegt yogaflæði til að mýkja upp líkamann fyrir kröftuga iðkun sem endar svo í góðri djúpslökun. Á meðan á flæðinu stendur spinnur Íris lifandi tóna á strengjahljóðfærið guzheng í bland við takta og tilfinningu. Þetta samspil tónlistar og hreyfingar skapar sannkallað yoga-tóna-flæði þar sem þátttakandinn fær að tengjast líkamanum, huganum og hjartanu. 

Tíminn hentar öllum getustigum og farið verður í fjölbreyttar og skapandi æfingar. Byrjendur og vanir iðkendur ættu að geta lagað æfingarnar að sínum þörfum og notið þess að hlusta á og hreyfa sig með lifandi tónlist. Í lok yogatónaflæðisins ber tónlistin iðkandann inn í langa og endurnærandi slökun. 

Þetta verður nærandi og ljúf stund sem enginn ætti að láta framhjá sér fara.

UM ÍRISI OG KATRÍU
Íris Thorarins er tónskáld sem vinnur bæði með raftónlist og akústísk strengjahljóðfæri á borð við fiðlur, hörpur og sér í lagi guzheng sem er aldagamall sítar frá Kína. Í flutningi sínum leikur Íris oftar en ekki með lifandi spuna í samspili við áhorfendur eða meðleikara þar sem rými er skapað fyrir hið óvænta. 

Nánar: https://www.iristhorarins.com/ og https://www.instagram.com/iris.thorarins/

Katrín Rögnvalds kennir opna tíma í yogaflæði og yoga nidra hjá Yoga Shala, auk þess að kenna grunnnámskeið fyrir nýja iðkenndur. Hún hefur fjölbreyttan bakgrunn í hreyfingu og hefur stundað bæði dans og yoga í fjölda ára. Markmið hennar er að tengja saman vitund, líkama og hreyfinu hjá þeim sem sækja tíma hjá henni.

Nánar: https://www.instagram.com/kadikatrin/