Slappaðu af, maður!

Lífið getur oft á tíðum verið krefjandi. Við erum vanir því að glíma við erfið verkefni og oft er nauðsynlegt að bíta á jaxlinn og fara áfram á hnefanum. Ef við höfum engin verkfæri sem hjálpa okkur að slappa mun streitan hafa áhrif á líkamlega og andlega heilsu. Yoga hjálpar okkur að finna stund milli stríða, komast úr áreiti nútímans og róa taugakerfið.

Slappaðu af, maður!  er Yoga námskeið fyrir karlmenn sem vantar verkfæri sem hjálpar þeim að ná fram slökun. Hópurinn hittist á mánudögum og miðvikudögum kl. 20:00-21:30 í þrjár vikur, alls 6 skipti og lærum og iðkum áhrifaríkar Yoga æfingar sem kalla fram kyrrð og ró í líkama og huga. Æfingarnar eru iðkaðar í hefðbundnum íþróttafötum.

Í fyrri hluta hvers tíma liðkum við okkur til með því að hreyfa og teygja líkamann og auk þess að notast við öndunaræfingar sem hjálpa okkur að slaka á. Í seinni hluta tímans iðkum við Yoga Nidra æfingar sem þýða má sem jógískan djúpsvefn. Hér liggjum við á mjúkri dýnu og látum leiða okkur í gegnum hugleiðslu sem þjálfar m.a. einbeitingu og líkamsskynjun. Yoga Nidra framkallar djúpslökun hjá iðkendum sem hefur m.a. jákvæð áhrif á streitu og kvíða og hefur reynst fólki vel sem glímir við þunglyndi og á við svefnvandamál að stríða. Það er ekki tilviljun að Yoga Nidra tímarnir eru með þeim vinsælustu, í Yoga Shala Reykjavík. Upplifun er sögu ríkari.

Stefán Atli Thoroddsen leiðir námskeiðið Slappaðu af, maður. Stefán hefur kennt í Yoga Shala Reykjavík frá árinu 2021 með áherslu á Yoga flæði (hreyfanlegt Yoga), Yoga Nidra (djúpslökun) og byrjendanámskeið fyrir karlmenn. Á þessu námskeiði munum við notast við bestu tólin úr báðum aðferðafræðum til þess að ná fram okkar markmiðum.

Stefán hefur iðkað Yoga frá árinu 2010 þegar hann þurfti að vinna í sínum eigin liðleika og styrk. Með árunum fór iðkunin að snerta dýpra við  Stefáni sem varð til þess að hann skráði sig í Yogakennaranám. Stefán útskrifaðist úr kennaranámi Yoga Shala Reykjavík árið 2021 og hefur einnig tekið kennaranám í Yoga Nidra og Pranayama (öndunaræfingar).